Jeshi la Magereza lakanusha kuachiwa huru kwa Babu Seya, laahidi kuwachukulia hatua wanaosambaza uongo huo

Jeshi la magereza limekanusha taarifa zilizokuwa zimezagaa tangu jana kuwa muimbaji mkongwe Nguza Viking aka Babu Seya na mwanae Papi Kocha wameachia huru.

Taarifa iliyotolewa na Mkaguzi wa Magereza na Afisa Habari wa Jeshi hilo, Lucas Mboje imesema kuwa taarifa hiyo ni ya uzushi.
“Hivi sasa kuna taarifa zimesambaa kupitia Ujumbe mfupi wa simu (SMS) na mitandao ya kijamii zikihusisha kuachiliwa huru kwa wafungwa wawili wanaotumikia Kifungo cha Maisha gerezani. Wafungwa hao wanaotajwa ni Nguza Vicking (Maarufu kwa jina Babu Seya) na Johnson Nguza(Maarufu kwa jina la Papii Kocha). Napenda kuufahamisha Umma wa Watanzania kuwa taarifa hizo zote zilizotolewa kupitia njia hizo ni za Uongo na uzushi mkubwa na zinalenga kuipotosha jamii kwani wafungwa hao wapo gerezani na wanaendelea kutumikia adhabu ya kifungo cha Maisha gerezani kwa mujibu wa Sheria,” imesema taarifa hiyo.
“Jeshi la Magereza nchini linatoa onyo kali kwa watu kujiepusha na uhalifu huo na linawataka wale wote wanaotumiwa ujumbe wa aina hiyo waepuke kuusambaza ujumbe huo kwa wengine bali waufute, kwani kuendelea kuusambaza ni kosa kisheria. Aidha, Jeshi la Magereza linaendelea na uchunguzi wa kina ili kuwabaini wanaosambaza ujumbe huo likishirikiana na vyombo vingine muhimu kwa lengo la kuwakamata wahalifu hao ili mkondo wa sheria uchukue nafasi yake.”