CAG kukagua ufisadi mabilioni Smart Partnership

Ni fedha zinazoidiwa kulewa wakati wa mkutano wa kimataifa uliofanyika jijini Dar es Salaam

Patricia Kimelemeta, Mwananchi

Dar es Salaam. Mdhibiti na Mkaguzi Mkuu wa Hesabu za Serikali(CAG, Ludovick Utouh, amesema kuwa atafanya ukaguzi maalumu wa kashfa ya wizi wa Sh8 bilioni zilizotumika katika mkutano wa Smart Partnership Dialogue.

Mkutano huo ambao ulifanyika Dar es Salaam kuanzia Juni 28 hadi Julai Mosi mwaka huu ulindaliwa na Wizara ya Mambo ya Nje na Ushirikiano wa Kimataifa hivi karibuni, ulihusisha viongozi wakuu wa Afrika.

Akizungumza na gazeti hili jijini Dar es Salaam jana, Utouh alisema kuwa, ukaguzi wa fedha hizo utaanza kufanyika Oktoba mwaka huu, huku ukienda sambamba na ukaguzi wa matumizi za wizara hiyo kwa mwaka wa fedha 2013/14.

“Tutafanya ukaguzi maalumu wa Sh8 bilioni zilizotumika katika mkutano wa Smart Partnership Dialogue ili tuweze kubaini matumizi ya fedha hizo,”alisema Utouh.

Aliongeza, kwa mujibu wa sheria, CAG anapaswa kukagua matumizi ya fedha zote za Serikali zinazotumika katika Wizara, Taasisi na Mashirika ya Serikali ili waweze kubaini uhalali wa matumizi ya fedha hizo kwa kila ibara.

Alisema, kwa sasa zoezi la kufunga hesabu linafanyika Septemba mwaka huu, kila wizara ikiwamo Wizara ya Mambo ya Nje na Ushirikiano wa Kimataifa zitatakiwa kuwasilisha taarifa hizo ofisini wake kwa ajili ya kuanza ukaguzi ambao utafanyika Oktoba mwaka huu.

“Kwa sasa wizara nyingi ikiwamo Wizara ya Mambo ya Nje inakamilisha zoezi la kuhakiki hesabu zao, na kwamba wakimaliza wanatupa taarifa ili tuweze kukagua hesabu zao za mwaka, jambo ambalo linaweza kutusaidia kubaini matumizi mabaya ya fedha za serikali kwa mwaka,” aliongeza.

Aliongeza ikiwa fedha hizo zimetumika kinyume na taratibu, zitabainika na kwamba watawalisha taarifa hiyo serikalini kwa ajili ya kuwachukulia hatua watu watakaobainika wametumia vibaya fedha za Serikali.